Kyk ook KOMMENTAAR onderaan.

*******

NG Kerk op ‘dun ys’ ná besluit oor gay huwelike | Netwerk24

Johan Eybers

Sondag, 25 September 2022

Die NG Kerk se besluit om nie ’n formulier te ontwikkel vir die bevestiging van burgerlike verbintenisse tussen mense van dieselfde geslag nie, getuig van ruggraatloosheid, pligsversuim, ondermyning en oneerlikheid deur die leierskorps.

So sê kerkleiers aan albei kante van die debat oor selfdegeslagverhoudings (SGV) in die NG Kerk nadat die Algemene Sinodale Moderamen (ASM) verklaar het dat hy nie die algemene sinode se besluit gaan deurvoer om so ’n formulier te ontwikkel nie.

Die ASM is die NG Kerk se hoogste besluitnemingsliggaam tussen byeenkomste van die algemene sinode (AS).

Die algemene sinode het in sy sinodesitting in 2019 die taakspan vir leer en aktuele sake gevra om ’n formulier te ontwikkel vir die bevestiging van burgerlike verbintenisse tussen persone van dieselfde geslag.

Die ASM voer nou aan die algemene sinode het nie ’n “prinsipiële besluit” ten gunste van selfdegeslagverbintenisse geneem nie, maar ’n “proses-besluit” en dat so ’n formulier daarom nie geskryf kan word nie.

Hennie Pienaar, ’n gay proponent in die NG Kerk en een van 12 litigante wat die kerk hof toe gesleep het weens die kerk se diskriminasie teen gay lidmate, sê dit lyk asof die kerk se leierskorps vergeet het dat die hooggeregshof hom in 2019 tereg gewys het oor sy hantering van die kwessie.

“Hulle maak nou dieselfde fout om nie by hul eie reëls te hou nie. Dit is oneerlik.”

Pienaar sê die jongste besluit betuig van die ASM se “ruggraatloosheid”. “Dit is vir die leierskorps belangriker om skynheilige eenheid te behou as om op te staan vir die randfigure in die kerk. Hulle dink as hulle eenheid behou gaan hulle groter punte by Jesus kry. Dit is in der waarheid onchristelik en nie wat Jesus sou doen nie.”

Dr. Frits Gaum, voormalige skriba van die NG Kerk se algemene sinode, sê die ASM se jongste besluit wys daar word heeltemal te veel aandag aan die behoudendes se kritiek oor selfde­geslagverbintenisse gegee sonder om met die ander kant te praat en herstellende geregtigheid vir hulle te verseker.

Hy sê die algemene sinode het ’n duidelike besluit in 2019 geneem oor die formulier, maar vir drie jaar is daar niks gedoen om die formulier te ontwikkel nie.

“Die ASM het ’n wonderlike nuwe onderskeiding uitgedink om van ’n besluit ontslae te raak wat vir sommige lastig is.”

Hulle “loop op baie dun ys” wanneer hulle só probeer onderskei tussen soorte besluite en die nie-uitvoering van duidelike opdragte. Hy sê dit herinner aan die ASM se besluit oor selfdegeslagverbintenisse van 2015 wat deur die ASM op ys geplaas is en wat op die ou end “ ’n hofsaak gekos het om dit uit die yskas te kry”.

Theo Danzfuss, voormalige aktuarius van die Hoëveld sinode en lid van die Kairos-netwerk vir dolerende gemeentes, het die ASM ook verlede week in ’n brief in die Kerkbode gekritiseer. Hy skryf dit is “oneerbaar om op so ’n wyse van die AS se lastige besluit ontslae te raak”.

“Die AS se notule lewer geen bewys van die bewering dat ons die SGV-besluite slegs as prosesbesluite moet verstaan nie.”

Nelis Janse van Rensburg, moderator van die algemene sinode, sê die 2019-besluit dat die formulier ontwikkel moet word, is ’n voorbeeld waar goed by ’n besluit bygevoeg word wat nie uitgevoer kan word nie.

“Die ASM het agterna gesien die algemene sinode se besluit oor ’n formulier weerspreek die eerste gedeelte van sy besluit waarin daar erken word dat daar vasgelooptheid binne die kerk is en daar ruimte vir almal geskep moet word.”

Hy sê in ag genome die besluit dat gemeentes self moet besluit oor die hantering van selfdegeslagverbintenisse kan die gedeelte oor die ontwikkeling van die formulier nie uitgevoer word nie.

“Die ASM het daarom besluit dat daar riglyne vir selfdegeslagverbintenisse opgestel moet word om leiding aan gemeentes te gee wat wel besluit om burgerlike verbintenisse tussen mense van dieselfde geslag te bevestig.”

Hy sê die kritiek is ongegrond dat die kerk se besluite net ter wille van eenheid geneem word. “Ons werk nie ter wille van eenheid nie, maar ons werk vanuit die eenheid van die kerk.”

Kommentaar

Daniel Louw

Let op Nelis se verskoning om nie die formulier op te stel nie:

…die 2019-besluit dat die formulier ontwikkel moet word, is ’n voorbeeld waar goed by ’n besluit bygevoeg word wat nie uitgevoer kan word nie.

“Die ASM het agterna gesien die algemene sinode se besluit oor ’n formulier weerspreek die eerste gedeelte van sy besluit waarin daar erken word dat daar vasgelooptheid binne die kerk is en daar ruimte vir almal geskep moet word.”

… in ag genome die besluit dat gemeentes self moet besluit oor die hantering van selfdegeslagverbintenisse kan die gedeelte oor die ontwikkeling van die formulier nie uitgevoer word nie.

Dit is ’n vreemde verduideliking. ’n Formulier kan mos steeds ontwikkel word en gemeentes kan dan besluit of hulle dit wil gebruik of nie.

Miskien moet die ASM vir Frits Gaum inspan om te help om so ’n formulier op te stel.