Kyk ook KOMMENTAAR onderaan.

*******

NG Kerk Vrystaat se verband met algemene sinode wéér onder loep | Netwerk24

Marita Herselman

Netwerk24

Saterdag, 6 Junie 2026

Die NG Kerk Vrystaat se verband met die algemene sinode sal weer eens onder die loep geneem word op die komende Vrystaatse sinodesitting.

Die teologies-kategoriale ring van die Vrystaat, ’n groepering van behoudende gemeentes, het die Vrystaatse sinode versoek om weer op die sinodevergadering daaroor te stem.

Die Vrystaatse sinodesitting word van Sondag tot Woensdag by Nampopark buite Bothaville gehou en dié kwessie is onder die beskrywingspunte wat ingedien is.

Sommige gemeentes stem onder meer nie saam met die wyse waarop die algemene sinode die Bybel interpreteer nie, ook wat selfdegeslagverbintenisse betref.

LEES OOK | Vrystaatse sinode kies eenheid

Die teologies-kategoriale ring het versoek sou die sinode nie besluit om bande met die algemene sinode te breek nie, om te stem vir die stigting van ’n tweede sinode wat onafhanklik van die algemene sinode se strukture funksioneer.

As dít nie sou slaag nie, versoek die ring die sinode om ’n proses van losmaking goed te keur vir gemeentes wat nie meer langer kans sien om deel van die verband te wees nie.

Intensiewe gesprekvoering oor die NG Kerk Vrystaat se verbintenis met die algemene sinode en alternatiewe opsies vir beswaarde gemeentes vind reeds sedert 2022 plaas.

Ds. Jan Lubbe, moderator van die NG Kerk Vrystaat en voorsitter van die algemene sinode se moderamen, sê egter die verdeeldheid in die Vrystaat het sedert 2022 aansienlik getaan.

“Ek ek dink daar’s ’n groter mate van begrip vir mekaar en ons weet ons het ’n konteks waarin ons ’n verskil moet maak.”

Hulle het geleer om na mekaar te luister en ’n pad saam te loop.

Lubbe sê die fokus van die sitting handel oor die roeping van die NG Kerk Vrystaat – die rol wat haar gemeentes in die samelewing vervul en hoe sy haar lidmate te midde van uitdagings kan ondersteun.

Sprekers vanuit verskillende sektore, wat insluit landbou en onderwys, sal ook afgevaardigdes toespreek.

Dié kwessie al sedert 2022 intensief bespreek

Die sinode het in 2022 in ’n gewone sitting besluit om die vraagstuk oor of sy uit verband met die algemene sinode gaan tree, eers vir verdere ondersoek te verwys.

’n Buitengewone sinodesitting is die daaropvolgende jaar gehou om onder meer daaroor te beslis, waarop die sinode besluit het om nie uit algemene sinodale verband te tree nie, maar met die algemene sinode in gesprek te tree oor sy standpunt.

Nóg ’n buitengewone sitting het in 2024 gevolg, waar die sinode besluit het om nie bande met die algemene sinode te breek nie en ook steeds as een streeksinode te groepeer. ’n Opsie was om die Vrystaatse sinode in twee te verdeel.

LEES OOK | Teologies-kategoriale ring in die Vrystaat bied ruimte vir behoudendes

Die moontlikheid van ’n teologies-kategoriale ring – wat gemeentes met dieselfde teologiese oortuigings verbind pleks van geografies – is op dié vergadering voorgestel as opsie vir gemeentes wat nie met die meerderheidsbesluit tevrede is nie.

Die NG kerk Harrismith, die NG kerk Kroonstad en die NG kerk Parys-Suid het die ring weens teologiese verskille onder gemeentes in die Vrystaatse sinode in Junie 2025 gestig, het Netwerk24 voorheen berig.

Dit bied ruimte vir eendersdenkende gemeentes om saam te groepeer.

Die ring het intussen tot sewe gemeentes gegroei, met die NG-gemeentes Allanridge, Marquard, Odendaalsrus en Vanstadensrus wat bygekom het.

Ds. Ulrich Ohlhoff, voorsitter van dié ring en leraar van die NG kerk Harrismith, sê die ontevredenheid met die algemene sinode handel oor teologiese hermeneutiek.

Volgens Ohlhoff het die aantal lidmate in die gemeentes wat deel van die ring is, aansienlik gegroei – in kontras met die algemene daling in lidmate in Vrystaatse gemeentes.

“Mense is dankbaar vir die besluite wat die kategoriale ring se gemeentes geneem het en die standpunte wat ons ingeneem het.” – marita.herselman@24.com

Kommentaar

xxx