Deur Daniel Louw

23 Junie 2025

Daar is drie dinge wat met ‘n “r” begin wat al tot die ondergang van baie mans gelei het:

1. Rok
2. Roem
3. Rykdom

1 Rok

In die Bybel lees ons hoe Dawid se buite-egtelike verhouding met Batseba sy goeie reputasie geruïneer het (2 Samuel 11-12). Alhoewel Dawid berou getoon het, het hierdie insident reuse implikasies gehad. In 2 Samuel 12:10-12 sê die profeet Natan:

(10)“Daarom sal die swaard nou nooit meer uit jou huis weggaan nie, want jy het My geminag toe jy Urija die Hetiet se vrou vir jou gevat het. (11)“So sê die Here: Van nou af gaan Ek uit jou eie huis ellende oor jou bring. Ek sal jou vrouens voor jou oë vat en aan iemand anders gee. Hy sal by jou vrouens slaap oop en bloot, (12)want jy het ‘n ding in die geheim gedoen, maar Ek sal alles oop en bloot voor die hele Israel doen.”

Dawid se huis het geweld, verraad en morele verval beleef:

• Dawid en Batseba se eerste seun het gesterf kort nadat hy gebore is.
• Amnon, een van sy seuns, het sy halfsuster Tamar verkrag.
• Absalom, Tamar se volle broer, het Amnon vermoor uit wraak.
• Absalom het later ‘n revolusie teen Dawid gelei en probeer om die troon oor te neem. Absalom het onder andere ‘n tent op die dak opgeslaan, sodat hy voor die oë van die hele Israel by sy pa se byvrouens kon gaan slaap (2 Sam 16:22). Dit was waarskynlik ‘n uitvloeisel van die voorspelling in 2 Samuel 12:11.
• Dawid moes uit Jerusalem vlug, en die koninkryk was amper verwoes.
• Absalom is later gedood, wat vir Dawid groot hartseer veroorsaak het.

Vandag is daar nog baie voorbeelde waar buite-egtelike verhoudings lewens verwoes het.

2 Roem

Die volgende is voorbeelde van mense wat tot ‘n val gekom het omdat hulle roem nagejaag het:

Lucifer / Satan

Volgens Esegiël 28:17 het Satan tot ‘n val gekom omdat hy hooghartig geword het.

Saul

Toe Samuel nie opdaag om die offer te bring nie, het Saul dit self gedoen (1 Sam 13:10).

Kort nadat Saul die Here se opdrag om Amalek dood te maak, verontagsaam het, het hy vir homself ‘n gedenkteken opgerig (1 Sam 15:12).

Nebukadnesar

Soos Saul het Nebukadnesar ook vir hom ‘n beeld opgerig waarvoor die mense moes buig (Dan 3). Hy het egter nie sy les geleer nie. God moet hom op die ou einde vir sewe jaar soos ‘n dier laat leef in die veld omdat hy hoogmoedig geword het (Dan 4:28-37).

Haman

In Ester 3 tot 7 lees ons hoe Haman gesmag het na roem. Dit het tot sy eie dood gelei.

Herodes Agrippa I

In Handelinge 12:21-23 lees ons dat Herodes ‘n toespraak gelewer het. (22)Die mense het toe geskreeu: “Dit is ‘n god wat praat, nie ‘n mens nie!” (23)Op daardie selfde oomblik het ‘n engel van die Here hom getref, omdat hy nie die eer aan God gegee het nie. Herodes is deur wurms verteer, en het gesterwe.

Vandag is daar baie gesinne wat ‘n afwesige pa het omdat hy besig is om roem by die werk na te jaag.

3 Rykdom

Die volgende mense in die Bybel het tot ‘n val gekom omdat hulle rykdom nagejaag het:

Akan

Akan het van die buit vir homself gevat toe die Israeliete Jerigo ingeneem het. Akan en sy mense is met klippe doodgegooi en verbrand. (Josua 7)

Gehasi

Nadat Elisa vir Naäman gesond gemaak het, het Naäman vir om geskenke aangebied. Elisa het egter geweier om dit te neem. Gehasi, Elisa se dienaar, het egter vir Naäman agterna gesit en vir homself geld en klere gevat. Hy is met melaatsheid getref. (2 Konings 5)

Judas Iskariot

Judas het Jesus verraai vir 30 silwer muntstukke. Hy het berou gekry en selfmoord gepleeg. (Matteus 26:14-16; Matteus 27:3-5)

Ananias en Saffira

Ananias en Saffira het voorgegee dat hulle die volle opbrengs van die verkoop van hulle eiendom aan die kerk gee het, maar in werklikheid het hulle ‘n gedeelte teruggehou. Beide is deur God dood neergeslaan. (Handelinge 5:1-11)

Net soos die najaag van roem afwesige pa’s skep, skep die najaag van rykdom afwesige pa’s met baie negatiewe gevolge vir die gesin.