4.2 Kerkverband

Die vrae rondom kerkverband het die grootste deel van die Dagbestuur se aandag gevra. Ons het deurgaans probeer om eerder te luister as om te veroordeel, en om die deur oop te hou.
Die Sinode van 2022 het gevra dat ’n taakspan die Sinode adviseer oor die interpretasie en toepassing van Artikel 37. Die Sinodale Regskommissie het daarmee begin, met inagneming van die werk wat die Algemene Taakspan Regte reeds gedoen het. Ná die besluite van die Algemene Sinode van 2023 het die landskap egter verander, en die taakspan se oorspronklike opdrag moes heroorweeg word.

In Augustus 2023 het die SDK ’n stigtingsverklaring van ’n Koinonia Ring van Standerton ontvang. Die Dagbestuur het in November 2023 met verteenwoordigers van die Ringskommissie gesprek gevoer oor die Ring se betrokkenheid by die Koinonia-groep. Die verteenwoordigers het aangedui dat hulle steeds lede van die Sinode Hoëveld is en graag lede van die NG Kerk wil bly, maar die vryheid soek om hulle van die Algemene Sinode te distansieer. ’n Verdere ontmoeting het in April 2024 gevolg.

In Februarie 2025 het die Dagbestuur die Ringe van Evander en Standerton besoek. Die gesprek met die Ring van Evander was met die Ringskommissie en die plaaslike predikant, die ander gemeentes van die Ring van Evander is later in die termyn besoek.

Die gesprek met die Ring van Standerton het op Sondag 2 Februarie 2025 by die NG Gemeente Charl Cilliers plaasgevind, met leraars en kerkraadslede van die gemeentes teenwoordig. Die Ringskommissie het die leiding geneem, en die verteenwoordigers van die SDK het toeligting gegee oor die kerkregtelike posisie. Die gesprek was nie maklik nie, maar dit was belangrik dat dit gevoer is.

Wat die opskorting van kerkverband betref: die kerkrade van die NG Gemeentes Kempton-Krag en Mooifontein het in Januarie 2024 aktes van opskorting uitgereik, en later in 2024 die gemeentes Eendracht, Evander, Secunda-Goedehoop en Charl Cilliers. Die NG Gemeente Mooifontein het sy akte weer teruggetrek en onderneem om sinodale bydraes te betaal. Die NG Gemeente Evander het sy besluit oor die opskorting van kerkverband in 2026 teruggetrek. Die Aktuarius van die Algemene Sinode het aangedui dat die Kerkorde nie voorsiening maak dat ’n kerkraad kerkverband opskort nie. Die kerkregtelike hantering van hierdie sake word verder behandel in die verslag van die Sinodale Regskommissie.*

Die gesprekke met kerkrade het soos volg verloop. In Mei 2024 was die Dagbestuur in gesprek met lede van die kerkraad van die NG Gemeente Sunwardpark — ’n positiewe en opbouende gesprek. In Junie 2025 is dit opgevolg met ’n verdere gesprek met die predikante en verteenwoordigers van daardie kerkraad, en daarna met ’n brief aan die kerkraad en die Ringskommissie.

In dieselfde maand het die Dagbestuur ook met die kerkrade van die NG Gemeentes Eendracht, Evander en Secunda-Goedehoop in gesprek getree.

’n Gesprek met die kerkraad van die NG Gemeente Brakpan-Noord is verskeie kere probeer reël, maar dit kon nie realiseer nie.