Die Bybel vergelyk die verhouding tussen Christus en Sy kerk met die verhouding tussen ‘n bruidegom en bruid. Net soos ‘n bruid gehoorsaam is aan haar man en na hom hunker, so moet die kerk ook hunker na Christus. (Efesiërs 5:22-27). Hierdie beeld kom in die volgende dele in die Bybel voor:

• Matteus 25:1-13 (gelykenis van die tien meisies)
• Markus 2:19-20 en Lukas 5:34-35 (hier word Jesus vergelyk as ’n bruidegom en sy dissipels as die bruilofsgaste)
• Johannes 3:29
• 2 Korintiërs 11:2
• Efesiërs 5:22-27
• Openbaring 19:7
• Openbaring 21:2

Die volgende is ’n vertaling van What does it mean that the church is the bride of Christ? (gotquestions.org)

Vraag: Wat beteken dit dat die kerk die bruid van Christus is?

Antwoord: Die beeld en simboliek van die huwelik word toegepas op Christus en die liggaam van die gelowiges wat as die kerk bekend staan. Die kerk bestaan uit diegene wat op Jesus Christus as hul persoonlike Verlosser vertrou het en die ewige lewe ontvang het. Christus, die Bruidegom, het die kerk opofferend en liefdevol gekies om sy bruid te wees (Efesiërs 5:22-27). Net soos daar in die Bybelse tyd ’n verlowingstydperk was waartydens die bruid en die bruidegom tot die bruilof van mekaar geskei is, so is die bruid van Christus gedurende die kerktydperk van haar Bruidegom afgesonder. Haar verantwoordelikheid gedurende die verlowingstydperk is om getrou aan Hom te wees (2 Korintiërs 11:2; Efesiërs 5:24). By die wederkoms sal die kerk met die Bruidegom verenig word en die amptelike ‘huwelikseremonie’ sal plaasvind en daarmee saam sal die ewige eenheid van Christus en sy bruid verwerklik word (Openbaring 19:7-9; 21:1-2).

In die ewige toestand sal gelowiges toegang hê tot die hemelse stad wat bekend staan as die Nuwe Jerusalem, ook genoem “die heilige stad” in Openbaring 21:2 en 10. Die Nuwe Jerusalem is nie die kerk nie, maar dit neem sommige van die kenmerke van die kerk aan. In sy visioen van die einde van die eeu sien die apostel Johannes die stad neerdaal wat versier is “as ’n bruid”, wat beteken dat die stad glansryk sal wees en dat die inwoners van die stad, die verlostes van die Here, heilig en rein sal wees, met wit klere van heiligheid en geregtigheid. Sommige het vers 9 verkeerd geïnterpreteer om te beteken dat die heilige stad die bruid van Christus is, maar dit kan nie wees nie omdat Christus vir sy volk gesterf het, nie vir ’n stad nie. Die stad word die bruid genoem omdat dit almal insluit wat die bruid is, net soos al die studente van ’n skool soms ‘die skool’ genoem word.

Gelowiges in Jesus Christus is die bruid van Christus, en ons wag met groot verwagting op die dag wanneer ons met ons Bruidegom verenig sal word. Tot dan bly ons getrou aan Hom en sê saam met al die verlostes van die Here: “Kom, Here Jesus!” (Openbaring 22:20).

Homoseksualiteit

Hierdie uitbeelding van Christus as bruidegom (man) en Sy kerk as sy bruid (vrou) is ‘n verdere argument teen homoseksualiteit.

In die Bybel word die mens verteenwoordig deur die man – in Genesis 2 word na Adam verwys as “die mens” (kyk spesifiek die 1953 vertaling):

(20)… maar vir die mens het hy geen hulp gevind wat by hom pas nie. (21)Toe het die HERE God ‘n diepe slaap op die mens laat val; en terwyl hy slaap, het Hy een van sy ribbebene geneem en die plek daarvan met vlees toegemaak. (22)En die HERE God bou die rib wat Hy van die mens geneem het, tot ‘n vrou en bring haar na die mens. (23)Toe sê die mens: Dit is nou eindelik been van my gebeente en vlees van my vlees. Sy sal mannin genoem word, want sy is uit die man geneem.

As homoseksualiteit ‘n aanvaarbare praktyk was, hoekom het die Bybel die verhouding tussen Christus en sy kerk vergelyk met die verhouding tussen ’n man en vrou (bruidegom en bruid)? Hoekom het die Bybel dit dan nie eerder vergelyk met ‘n liefdesverhouding tussen twee mans nie?